'रमजान'च्या पवित्र महिन्याच्या समाप्तीनंतर जवळपास ७० दिवसानंतर हा सण साजरा केला जातो. इस्लामिक मान्यतेनुसार हजरत इब्राहिम आपला मुलगा हजरत इस्माईल याला याच दिवशी इश्वराच्या आदेशानुसार 'कुर्बान' करण्यासाठी घेऊन निघालेे होते. तेव्हा अल्लाहने त्यांच्या मुलाला जीवनदान दिले. या दिवसाची आठवण म्हणून हा सण साजरा केला जातो.
'ईद उल अजहा' किंवा 'ईदे- अजहा' हा सण प्रामुख्याने 'बकरी ईद' म्हणून ओळखला जातो. हा सण मुस्लिम धर्मियांचा अत्यंत महत्त्वाचा सण मानला जातो. मुस्लिम धर्मियांमध्ये एकूण तीन प्रकारे ईद साजरी केली जाते. त्यातील इतर दोन प्रकार म्हणजे ईदुलफित्र किंवा रमजान ईद आणि मिलादुन्नबी ईद. हे तीन्ही सण बंधुभाव, त्याग, समर्पण आणि मानवतेचा संदेश देतात.
'ईद उल अजहा' ला अनेक नावांनी ओळखले जाते. या ईदला 'नमकीन ईद' किंवा 'ईदे कुरबां' असेही म्हटले जाते. या दिवशी चटपटीत खाद्यपदार्थांची रेलचेल असल्याने 'नमकीन ईद' तसेच या सणाचा 'कुर्बानी'शी संबंध असल्याने ईदे कुरबां' म्हटले जाते.
सर्वसामान्यपणे या सणाचा संबंध बकऱ्याशी लावला जातो, पण प्रत्यक्षात तसे नाही. 'बकर' या शब्दाचा अर्थ 'मोठा प्राणी' ज्याचा 'जिबह' म्हणजेच बळी दिला जातो, असा आहे. यातून 'बलिदान' अर्थात 'त्यागा'ची भावना अधोरेखीत केली जाते. अरबी भाषेत 'कर्ब' या शब्दाचा अर्थ अत्यंत जवळ असा होतो. म्हणजेच यावेळी ईश्वर व्यक्तीच्या सर्वात जवळ असतो. परंतु भारत, पाकिस्तान आणि बांग्लादेशात या शब्दाचा अपभ्रंश झाल्याने या सणाला 'बकरा ईद' असे म्हटले जाते.
या दिवशी कुर्बानीचा एक हिस्सा कुटुंबीयांसाठी, दुसरा हिस्सा नातेवाईकांसाठी आणि तिसरा हिस्सा गोरगरिबांसाठी देण्याची प्रथा आहे.
हिंदूधर्मीयांच्या दिनदर्शिकेत दर तीन वर्षांनी अधिक महिना येतो. त्यामुळे मुस्लिमधर्मीयांचा एक महिना अगोदर येतो. या वर्षी २०१८ मध्ये श्रावण महिन्यात बकरी ईद आली आहे.
अशा या बकरी ईद सणाच्या निमित्ताने सर्व मुस्लिम बांधवाना खूप खूप शुभेच्छा.
कोणत्याही टिप्पण्या नाहीत:
टिप्पणी पोस्ट करा